Vaykira du Coral Twivro
Australian Shepherd, Hündin, Red Merle c/w
26.11.2004 – 17.09.2018

Warum sie nicht mehr bei uns ist: „ihre letzte Geschichte“

I dä letschte Täg bin ich immer wieder gfröget worde, was dänn passiert isch das d’Vaykira so plötzlich nüme bi eus isch, drum han ich mich entschiede wie bim Ajano iri Gschicht uf z’schriebe und da uf eusere Home-Page z’veröffentliche:

leider isch si sehr chrank gsi , mir händs aber au erst sit mer vo Fräschels vo dä Ferie hei cho sind gwüsst (19.08.18), da hät sie ständig Naseblüete gha, zerscht hämmer no dänkt si hegi bim bade neumed ahgschlage, wills aber ned besser worde isch simmer zum TA, deht händs es Röntgebild vom Chopf gmacht und d‘Nase endoskopiert, i dä Nase händs nüt gseh, aber uf em Röntgebild hät mer gseh, dass sie scho e grösseri Verschattig i dä Nase hät (vermuetlich en Tumor) wämmers ganz genau hettet welle wüsse het mer dänn müesse es CT mache, das hämmer aber ned welle will mer scho gwüsst händ das mers weder wettet operiere no bestrahle, drum hämmer gseit mer gnüssed eifach no di restlichi Ziit, das es grad sooo schnäll gaht, da isch jetzt au dä TA überrascht gsi.

vorletscht Wuchenänd (8.9.18) ischs ere au scho mal zimlich mies gange da hämmer au scho dänkt gha jetzt müemmer si gah lah aber dänn hät sie sich nomal mega ufgfange aber geschter isch es sooo klar gsi das si nüme mag, dass mirs ihre eifach no Schuldig gsi sind si uf dem letschte Wäg z‘begleite.

Vo dem här sind mir jetzt gar ned so unglücklich das es so „schnäll“ gange isch, si hät ned müesse liede unds eus sehr klar zeiget. Mir sind sehr froh & dankbar das mir no es wunderschöns und sehr intensivs Wuchenänd im Schwarzwald händ dörfe mit ihre verbringe. Am morge simmer nomal mit allne go spaziere und ich glaube so häts für alli gstume.

Machs guet Schnegge mir wärdet dich für immer i eusem Herze ha !